ILOILO CITY- Padayon pa ang paghibalo sang kapulisan sa iban nga detalye may kaangtanan sa pagkasapo sa lapsag nga nasulod sa plastic kag wala na sang kabuhi sa kalog sa Barangay Rizal, La Paz, Iloilo City .
Sa interview sang Bombo Radyo kay PMaj Jose Val Ladublan, hepe sang La Paz Police Station, iya ginpahayag nga tubtob subong, indi pa nila maistorya sang maayo ang 24-anyos nga iloy sang lapsag.
Suno kay Ladublan, posible nga yara pa sa state of shock ang iloy nga admitted pa subong sa ospital.
Nahibaluan nga naggwa sa imbestigasyon nga sa iya ginaistaran nga boarding house nagbun-ag ang babaye.
Nag-ako man ini nga patay na sang ginbun-ag ang lapsag apang wala na ini nagsaysay kun ngaa ginbilin lang nila sang iya live-in partner ang lapsag sa kanal.
Samtang, may salabton sa layi ang ginikanan sang lapsag nga ginhaboy lang sa kalog sa Barangay Rizal, La Paz, Iloilo City kun mapamatud-an nga hungod ini nga ginpatay.
Sa interview sang Bombo Radyo kay Atty. Noel Palomado, Bombo Abugado, iya ginpahayag nga santo sa penal code, kun intentional abortion ang natabo ukon hungod nga ginpahulog sang ginikanan ang lapsag, reclusion perpetua ukon lifetime imprisonment ang silot; kun unintentional abortion naman ang natabo, halimbawa, napatay ang bata bangud sa violence, ang silot ang yara sa 6 tubtob 12 ka tuig nga pagkapreso.
Suno kay Palomado, kun tatlo ka adlaw na nga nabun-ag ang lapsag kag ginpatay ini sang ginikanan, ukon sin-o man nga tawo, kaso nga infanticide ang ipasaka kag may silot nga reclusion perpetua; kun masobra tatlo ka adlaw naman nga nabun-ag ang lapsag kag hungod ini nga ginpatay, parricide ang kaso kag reclusion perpetua man ang silot.
