Wala pa nabatyagan ang low supply sang patatas sa Western Visayas subong nga semana.
Sa interview sang Bombo Radyo kay Maria Teresa Tuvilla-Solis, ang agribusiness and marketing assistance division chief sang Department of Agriculture (DA) Region VI, iya ginpahayag nga sandig sa latest monitoring sa mga merkado sa rehiyon, wala naghulag ang presyo sang patatas ipaanggid sa presyo sang nagligad nga semana.
Yara sa P70-P90 per kilo ang price range suno sa natungdan.
Kun maghulag suno kay Solis, indikasyon man ini nga may movement man sa suplay sa rehiyon.
Suno kay Solis, ang Western Visayas ang nagakuha sang suplay sang patatas sa Kanlaon, Negros Occidental, sa Baguio City, Leon, Iloilo, kag sa bahin sang Mindanao.
Talalupangdon nga may yara sang mga fast-food chains kag restaurants nga nagauntat na sa pagserbe sang large kag medium-sized french fries.
Ginpaathag ni Solis nga imported nga patatas ang ginagamit sa sini nga fast food chains bangud mas barato ang ready-to-fry potatoes nga ila ginabakal.
Ang mga locally-produced naman nga patatas amo ang ginabaligya sa mga public market.
Nag-engganyo man ang natungdan sa mga mangunguma nga padayunon lang ang pagtanum sang patatas.
Sa national nga lebel, may mga agriculture groups nga nagpahayag nga nag-untat na sa pagtanum ang mga mangunguma bangud sa indi maaguwantahan nga presyo sang fertilizer.
