Nakabaton na sang service honoraria ang masobra 15,000 ka manunudlo sa probinsya sang Iloilo nga nagserbe bilang kabahin sang electoral board (EB) sang May 9 national and local elections.
Sa interview sang Bombo Radyo kay Mr. Leonil Salvilla, spokesperson sang Department of Education (DepEd) – Schools Division of Iloilo, iya ginpahayag nga P7,000 ang regular honoraria para sa EB chairperson, P6,000 sa EB members, P5,000 sa DepEd Supervisor Official (DESO), kag P3,000 para sa support staff kag medical personnel.
Sa probinsya sang Iloilo, 15,571 ka personnel sang DepEd ang nakabaton sang honoraria halin sa Commission on Elections (Comelec).
Subong lang nga Lunes, Mayo 30, gin-aprubahan man sa Senado sa third and final reading nga i-exempt sa income tax ang election period service honoraria kag allowances nga ginahatag.
Antes pa man ang 2022 elections, matandaan nga naghingyo man mismo ang DepEd sa gobyerno kag sa Comelec nga i-exempt ang election service honoraria sa ginapatuman nga taxation ukon imposition sang 20% withholding tax. ##
