Naga-apelar ang mga barangay officials sa mga residente sa Barangay Pali Benedicto, Mandurriao, Iloilo City nga himuon na nga rutina ang pagpanglimpyo sa palibot agud nga indi na madugangan ang dengue cases sa barangay.
Sa interview sang Bombo Radyo kay Punong Barangay Allan Juarez, iya ginpahayag nga may lima na ka kaso sang dengue nga na-rekord sa ila lugar — isa diri ang walo ka tuig nga bata.
Suno kay Juarez, may na-conduct na nga misting sang nagligad nga semana, apang may patigayunon liwat buwas sa bulig sang City Health Office (CHO).
Nagpangabay man si Juarez nga padayunon ang Oplan Kaya-Kulob kag ang four o’clock habit nga pagpaninlo.
Ginapanugyan naman sang Department of Health (DOH) ang 4S strategy: search and destroy mosquito-breeding sites; self-protection measures; seek early treatment; kag support fogging/spraying sa hotspot areas. ##
