ILOILO CITY – Ginkakibot kag ginkasubo sang fans sang entertainment industry ang pagbulagay sang hitmaker nga si Moira dela Torre kag bana sini nga si Jason Hernandez.
Sa ginpagwa nga joint statement nga gin-post ni Jason sa iya social media accounts, ginpahayag nila nga nagakasubo sila nga pagkatapos sang tatlo ka tuig nga pag-asawahay, mabulagay na ang mga ini.
Nagpangayo ang duha sang privacy sa ginakabig nila nga ‘difficult time’.
Gin-share naman ni Moira ang social media post ni Jason kag wala na nagdugang sang personal nga statement.
Sa kaugalingon nga post ni Jason, ginkabig niya ang amo nga announcement nga pinakabudlay nga butang nga iya ginsulat.
Suno kay Jason, ginpakaslan niya ang iya nga bestfriend nga may tinutuyo nga makaupod ini tubtob sa katapusan.
Gin-ako naman ni Jason nga wala siya nangin ‘faithful’ kay Moira sa tion sang ila nga relasyon.
Nagpangayo man ini sang pasaylo kay Moira kag subong man sa tanan nga nasakitan sang ila pagbulagay.
Una na nga naggwa ang mga espekulasyon sang Abril matapos nga na-obserbaran sang mga fans nga gin-delete ni Moira ang kalabanan sa mga pictures nila ni Jason kag wala niya nakaupod sa iya trip abroad.
Gilayon man ini nga ginpanginwala sang duha.
Ang isa sa mga hit songs ni Moira nga ‘Tagpuan’ ang ginhalad niya kay Jason bangud nga sang tion nga nagkilalahay sila, naga-move on pa lamang si Moira nagikan sa isa ka heartbreak.
Sa filming sang music video sang amo nga kanta nag-propose si Jason.
Si Moira ang kilala sa mga hugot hits sini kun sa diin, ang pinakaulihi amo ang ‘Paubaya’.
