ILOILO CITY – Ginbasura sang China ang panawagan sang Pilipinas nga untaton ang unilateral ban sa gina-awayan nga West Philippine Sea.
Suno kay Chinese Foreign Ministry spokesman Zhao Lijian, ang unilateral fishing ban sa West Philippine Sea ang nagasunod sa international law lakip na sa United Nations Convention on the Law of the Sea (UNCLOS) kag ini ang sakop pa sang ila sovereign right.
Ang UNCLOS ang isa ka international treaty nga ginpirmahan sang 160 ka mga pungsod lakip na sang Pilipinas kag China nga nagapahanugot sa coastal nations nga mag-explore, manage kag exploit sang resources sa sulod sang 200 nautical miles sang ila nga baybayon.
Ang moratorium sang China nga nagsugod sang Mayo 1 tubtob Agosto 16 ang wala ginakilala sang Department of Foreign Affairs (DOF) bangud sakop pa ini sang lugar kun sa diin ang Pilipinas ang naga-exercise sang “sovereignty, sovereign rights, and jurisdiction.”
Ang nasambit nga banning ang wala sang basihan sa layi, wala nagasunod sa mutual trust kag wala nagarespeto sa duha ka pungsod.
Suno sa China, indi sini mabaton ang akusasyon sang Pilipinas nga nabutang sa protest sang nagligad nga Mayo 30.
Suno kay Zhao, nagalaum sila nga tan-awon sang Pilipinas ang ini nga butang sa objective kag correct perspective kag tumanon ang obligasyon bilang littoral state sang West Philippine Sea agud nga ma-promote ang sustainable development sang pagpangisda sa disputed sea.
Sa Paragraph 716 sang arbitration sang Permanent Court of Arbitration sa The Hague, Netherlands sang Hulyo 12, 2016, nasaad nga ang ano man nga Chinese fishing moratorium sa West Philippines Sea nga nasakupan sang exclusive economic zone ang iligal suno sa Department of Foreign Affairs (DFA).
Ini ang wala naman ginsapak sang China kag ginpadayon ang indisputable kag historic rights sa masobra 90% sang West Philippine Sea nga isa ka major shipping route kag ginapahayag nga manggaranon sa oil kag gas reserves.
