Plano sang Metro Iloilo Transport Service Cooperative (MITSCOOP) kag sang dalagku nga transport groups nga mag-file liwat sang petition agud nga pasakaan ang plete sa modernized jeepneys sa syudad sang Iloilo.
Sa interview sang Bombo Radyo kay Jose Marie Delos Reyes, chairman sang MITSCOOP, iya ginpahayag nga 3 pesos tubtub sa 5 pesos ang ginalantaw nga fare increase.
Sang nagligad nga bulan suno kay Delos Reyes, may yara naman sang petition for fare increase nga gin-file sa Land Transportation Franchising and Regulatory Board (LTFRB) apang ginbasura suno sa natungdan.
Suno kay Reyes, subong nga may forecast nga may big-time oil price hike naman sa masunod nga semana, ginakahangaw-an nga ubuson gid sini suyop ang tanan nga income sang drivers kag maapektuhan man pati ang operasyon sang modernized jeepneys.
Santo sa forecast, ginapahayag nga magasaka ang kada litro sang diesel sa P6.30 tubtub sa P6.60 epektibo sa Martes, Hunyo 7.
Samtang, P2.50 to P2.80 per liter naman ang ginalantaw nga pagsaka sa presyo sang gasolina.
Posible suno kay Delos Reyes nga yara na sa P100 ang presyo kada litro sang gasolina kag diesel sa katapusan sang tuig.
Suno pa sa natungdan, indi na gani mapasakaan ang sweldo sa mga konduktor kag drivers.
Magluwas pa diri, subong nga Hunyo, epektibo naman ang wage increase sa mga mamumugon sa Western Visayas rason nga nagapang-agay na ang grupo sa ila nga operating expenses. ##
