Sa labing-una nga tion sa sulod sang 19 ka tuig, wala sang bisan isa sa Big Three sa tennis ang nakasulod sang top two sang ATP world rankings.
Halin sang Nobyembre 2003, nangin consistent ang rekord nga sanday Novak Djokovic sang Serbia, Rafael Nadal sang Spain, kag Roger Federer sang Switzerland ang yara sa top two — baliskad sa natabo subong nga ATP World Rankings.
Nakuha sang Russian tennis star nga si Daniil Medvedev ang number one rank, pangaduha ang injured player nga si Alexander Zverev sang Germany, kag pangatlo si Djokovic.
Si Nadal naman (nga nagkampyeon sa French Open sang nagligad nga semana) ang yara sa ikaapat nga puwesto, samtang nagtabog naman sa ika-68 nga pwesto si Federer.
Ang ika-lima sa rank subong amo ang French Open runner-up nga si Casper Ruud sang Norway.
Nakuha ni Medvedev ang number one spot duha ka semana antes ang Wimbledon sa United Kingdom kun sa diin indi siya pagpahanugutan nga makahampang.
Nahibaluan nga wala sang puntos nga makuha halin sa Wimbledon, bangud ginkakasan ini sang ATP kag WTA sang ranking points sang nag-desisyon ini nga i-ban ang tanan nga Russian kag Belarusian players bangud sang Russian invasion sa Ukraine.
Sa hampang sa Wimbledon, si Nadal ang heavy favorite nga makalutos sa defending champion nga si Djokovic apang wala pa subong sang maathag nga anunsyo halin sa kampo ni Nadal kun madayon ini sa hampang bangud nagpaidalom ini sa treatment sa chronic foot condition kasunod sang kadalag-an sa French Open.
Gutom man sa kadalag-an si Djokovic bangud wala ini sang nadag-an nga major tournament halin sang nakuha ang kampyeonato sa Wimbledon sang nagligad nga tuig.
Magaumpisa ang Wimbledon sa Hunyo 27-Hulyo 10 sa London, UK.
