ILOILO CITY – Bangud sang nagapadayon nga pagsaka sang presyo sang gatung kag kakulang sang public transport, dapat nga i-implementar sang gobyerno ang work-from-home options para sa mga empleyado sang gobyerno bilang pagsuporta sa ila nga wala naga-compromise sang madasig kag reliable nga serbisyo sa publiko.
Ini ang ginpahayag ni Senator Grace Poe matapos sang ginpaggwa nga polisa sang Civil Service Commission (CSC) nga naga-institutionalize sang adaptable setup sa gobyerno samtang nga naga-shift sa new normal ang pungsod.
Suno kay Poe, bilang frontliners sa pagdul-ong sang basic services, ang mga government workers ang nagakinahanglan sang suporta agud nga mabatuan ang nagataas nga presyo sang essential goods kag kakulang sang public transport.
Nagalaum ang senadora nga mapungkuan sang mga pinuno sang ahensya kag stakeholders ang nasambit nga butang kag magdihon sang guidelines.
Dugang pa niya, ang resolution sang CSC ang nagapahanugot sang mga work arrangements kaangay sang flexiplace, compressed work week, skeleton force, work shifting, flexitime ukon kombinasyon sang mga schemes.
Apang ang ini nga polisa ang naga-require sa gihapon sang mga mekanismo para sa daily ukon weekly reports, paggamit sang communication platforms kag nagaka-igo nga security measures agud nga mapasiguro nga mahatag ang kalidad nag government services.
Pahayag dugang sang natungdan, ang flexible work arrangement ang mangin mekanismo man para sa government agencies agud nga mahagan-hagan ang demand sang gatung kag mabuligan ang publiko nga magbawi sa sampaw-sampaw nga kabudlay sa public transportation.
