ILOILO CITY – Gin-kwestiyon sang Commission on Audit (COA) ang over disbursements sang National Anti-Poverty Commission (NAPC) nga nagdangat sa P8 million agud bayaran ang consultants nga indi necessary suno sa state auditors.
Sa annual audit report, nagapakita nga ang pag-hire sang NAPC sang consultants ang wala nag-agi sa posting requirements sa Philippine Government Electronic Procurement System (PhilGEPS) nga nagalapas sa Procurement Law kag sa Revised Implementing Rules and Regulations (RIRR).
Gin-note man sang COA nga ang kabilugan nga gasto agud nga bayaran ang consultants ang naglapaw sa total budget indicated sa Annual Procurement Plan (APP) sang ahensya sang 2021 nga indi compliant sa provisions sang Procurement Law kag RIRR.
Ang total budget sa consultancy services nga nakabutang sa APP sang ahensya ang nagdangat lamang sa P300,000 sa 2021 samtang ang kabilugan nga gingasto ang nagdangat sa P8,219,636.
Ang procurement sang consulting services pinaagi sa individual consultant ukon sa consultancy firm ang cover sang provisions sang RA 9184.
Suno sa COA, ang pag-hire sang consultants nga wala sang public bidding ang indi justifiable.
Ang gin-hire nga 13 ka consultants ang ginalakipan sang anum ka legal consultants, apat sa media, tag-isa sa financial, gender and development/ indigenous people kag economic affairs consultant.
Ang pag-hire sang unnecessary consultants ang nagresulta sa additional expenditures nga nagdangat sa P3.39 million.
Suno naman sa NAPC, ang mga consultants ang legal nga gin-hire kag ang ila nga technical skills ang kinahanglan sang ahensya.
