ILOILO CITY- Nangin agaw-atensyon ang eksena sa isa ka kasal sa Antique bangud sa baylo nga bridal car, sa backhoe nagsakay ang ginkasal nga magkahagugma kalakip na ang ila bilog nga entourage agud makatabok sa nagabaha nga suba.
Ang ginkasal amo sanday Ivy Alentajan Sareno, empleyado sang munisipyo sang Sibalom kag si Regie Sareno, barangay kagawad kag lunsay residente sang Brgy. Igcococ, Sibalom, Antique.
Sa interview sang Bombo Radyo kay Ivy Alentajan Sareno, iya ginpahayag nga matapos ang kasal kag padulong na na ang mga ini sa reception, naglapaw ang tubig sa suba.
Suno kay Sareno, bangud imposible nga magnabaw ang tubig, nadesisyunan nila nga hulamon ang duha ka mga backhoe nga ginagamit sa gina-construct nga taytay sa lugar.
Samtang nakasuksok pa sang bayo nga pangkasal ang duha, nagsakay ang mga ini sa backhoe agud makatabok kag amo man ang ila ginabanta 200 nga mga bisita.
Dako naman ang pagpasalamat sang mga ini nga wala sang malain nga natabo sa ila samtang ginakarga sang backhoe sa tunga sang mabaskog nga daludo sang tubig-baha.
