ILOILO CITY- Ginlauman na sang isa ka criminal law expert ang nangin ruling sang Supreme Court nga pag-dismiss sa disqualification petitions batok kay incoming President Ferdinand “Bongbong” Marcos Jr.
Sa en banc full court session sang Martes, 13 ka mga justices ang nagboto para sa dismissal sang mga petisyon para sa disqualification kag cancellation sang certificate of candidacy (COC) ni Marcos.
Sa interview sang Bombo Radyo kay Atty. Nelson Borja, iya ginpahayag nga sang una pa lang, maathag na nga indi makabig nga ground sa disqualification sa kandidatura ni Marcos, Jr. ang iya conviction bangud sa failure nga mag-file sang income tax returns (ITRs).
Kun balikan ang timeline sa kaso ni Marcos:
- Sang Hulyo 27, 1995, gin-convict sang Quezon City Regional Trial Court si Marcos bangud sa walo ka mga kaso sa paglapas sa Section 45 sang 1977 National Internal Revenue Code (NIRC).
Gin-sentensyahan si Marcos sang pagkapreso kag ginmanduan man nga bayaran ang iya taxes sa tuig 1982, 1983, 1984 kag 1985. - Sunod nga ginpasaka ni Marcos ang conviction sa Court of Appeals (CA) nga amo ang nag-uphold sa findings sang lower court. Gin-modify ang desisyon: sa baylo nga pagkapreso kag multa nga kwarta, gin-impose lang ang multa nga kwarta batok sa iya.
- Gin-apelar ni Marcos sa Korte Suprema ang desisyon sang CA apang gin-withdraw man ang iya appeal rason nga nahimo ini nga “final and unappealable conviction”.
- Ginbayaran niya ang multa sang Oct. 31, 1997.
Suno kay Atty. Borja, bangud sa desisyon sang CA, nadula na ang imprisonment involving moral turpitude ukon nadula na ang criminal aspect.
Pahayag ni Borja, apisar nga subject pa sa gihapon sa motion for reconsideration ang pinakaulihi nga ruling sang korte,halos wala na ini sang bug-at.
Dugang ni Borja, bangud sini, mangin tayuyon na ang pagpungko ni Marcos bilang presidente.
Suno sa abogado, makabig naman nga double celebration ang inagurasyon ni Marcos Jr. bangud sa amo nga ruling sang korte suprema.
