Gin-athag sang Land Transportation Franchising and Regulatory Board (LTFRB) Region 6 nga mahimo na makabukas ang Ticud Terminal sa La Paz, Iloilo City kag mahimo na makasulod ang mga van kag ang mga jeep nga may byahe pa-banwa sang Dumangas.
Diri nga terminal nagadiretso ang mga jeep nga may byahe pa-Dumangas kag diri man nagahulat ang mga van nga nagabiyahe sa Lemery via San Rafael kag Barotac Viejo.
Sa interview sang Bombo Radyo kay Atty. Salvador Altura, Jr., legal officer sang LTFRB Region 6, ginpahayag nga sa Ticud Terminal naman magakadto ang mga PUVs nga gina-cater anay sang terminal sa Baldoza.
Nahibaluan nga gindagdagan na sang closure order ang terminal sa Baldoza kag sang tion nga wala pa ginbuksan ang Ticud Terminal, gintingob ang mga salakyan sa terminal sa Barangay Tagbak, Jaro.
Matandaan nga antes pa man ginpatuman ang Local Public Transport Route Plan (LPTRP) sa Iloilo City sang Hunyo 12, nag-inspect ang LTFRB Region 6 sa mga terminal kag nakit-an nga non-functional kag non-operational ang nakabutang sa Ticud terminal rason nga nalakip sa mga ginsirado.
Ginbalik ini kasunod sang hingyo sang drivers kag commuters kag bangud nahibaluan man nga indi man expired ang ila nga permit. ##
