Amat-amat na nga tugutan ang mga provincial jeepneys nga makasulod sa syudad sang Iloilo buwas, Hulyo 8.
Buwas magasugod ang implementasyon sang 45 ka adlaw nga suspensiyon sang kontrobersyal nga Local Public Transport Route Plan (LPTRP).
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag indi pa 100 porsyento nga makabalik sa daan nga ruta ang mga provincial jeepneys bangud hatagan man sang tion nga maka-adjust ang mga driver.
Ginkumpirma man ni Conlu nga indi na kinahanglan ang special permit halin sa Land Transportation Franchising and Regulatory Board (LTFRB) Region 6 kag wala naman sang mga dokumento kag balayran nga i-proseso ang jeepney operators kag transport cooperatives.
Sa interview naman sang Bombo Radyo kay Atty. Salvador Altura, Jr., legal officer sang LTFRB Region 6, iya ginpahayag nga indi na mag-isyu sang bag-o nga special permits ang ahensya kag gamiton na lang ang daan nga mga special permit.
Bangud sini suno kay Altura, wala naman sang iga-isyu nga specific fare matrix kag indi na kinahanglan nga magpadulong ang mga driver kag jeepney operators sa opisina sang LTFRB para sa dugang pa gid nga hilikuton.
Sa pagpahanugot sa pagsulod liwat sang first town jeepneys, gina-acknowledge man ni Altura nga may gamay ini nga kumplikasyon bangud nga pahanugutan man nga makabyahe sa gihapon ang mga jeepney units sa bag-o nga mga ruta sa syudad. Maga-overlap ini suno kay Altura kag magulpi nga magadamo liwat ang volume sang salakyan sa amo lang mga ruta. Apang pahayag ni Altura, nagpasalig man ang PSTMO nga i-giyahan gid ang trapiko agud indi magpugok ang mga salakyan. ##
