Nalakip ang Iloilo-Capiz-Aklan Expressway sa lista sang priority public-private partnership (PPP) projects nga ipatuman sang Department of Public Works and Highways (DPWH) sa idalom sang administrasyon ni President Ferdinand ‘Bongbong’ Marcos, Jr.
10 tanan ka mga PPP projects ang ginbalhag sang ahensya para sa natalana nga implementasyon.
Suno sa website sang DPWH, ang PPP amo ang government service ukon private business venture nga gina-pondohan, ginatukod, kag gina-operate paagi sa partnership sa tunga sang gobyerno kag private sector.
2020 pa lang, ginaduso na ang feasibility study para sa amo nga expressway nga amo ang ginalauman nga magaangot sang mga probinsya sang Iloilo, Capiz, kag Aklan.
Ginapahayag anay nga amo ini ang ginaduso samntang nga ginahulat ang development sa proposed Panay Railway nga kabahin naman sang una nga lista sang major projects sa idalom sang Build, Build, Build program sang nagligad nga Duterte Administration.
Lakip man sa iban nga nalista sang DPWH sa amo sa priority PPP projects amo ang P12.6-billion Central Luzon Link Expressway (CLLEX) nga maga-angot sang Cabanatuan City kag San Jose City sa Nueva Ecija; 56.9-kilometer Metro Cebu Expressway nga maga-angot sang Naga City kag Danao City; ang 12.45-billion rehabilitation works para sa Kennon Road, isa sa mga mayor nga dalan padulong sa Benguet Province; ang North Luzon Expressway East Phase 2; ang Mindoro-Batangas Super Bridge; ang Pacific Eastern Seaboard Expressway; ang Naawan-Opoi-Cagayan de Oro City-Villanueva Expressway; ang Pangasinan-Nueva Ecija Expressway; kag ang Dingalan-Capas-Botolan Expressway.
Una na nga ginpahayag ni National Economic and Development Authority (NEDA) Secretary Arsenio Balisacan nga target sang Marcos Jr. administration nga pauswagon pa ang PPP ilabi na para sa big-ticket projects.
