ILOILO CITY- Nagpasar ang Chairman sang Committee on Transportation sa Iloilo City Council sang resolution nga nagaduso sa pagpatigayon sang transport summit antes ipasa liwat sa Land Transportation Franchising and Regulatory Board (LTFRB) ang amended Local Public Transport Route Plan (LPTRP) sang syudad.
Ang nasambit nga resolution ang nagahingyo kay Iloilo City Mayor Jerry Trenas nga mag-facilitate sang amo nga summit.
Sa interview sang Bombo Radyo kay City Councilor Atty. Sedfrey Cabaluna, Chairman sang nasambit nga komitiba, iya ginpahayag nga pinaagi sa transport summit, tanan nga suhestyon kag concerns nga ginpalab-ot sang publiko pinaagi sa konsultasyon ang tipunon kag i-presentar sa pumuluyo agud mahibaluan ang ginaduso nga mga ruta.
Sa mga orientation nga ginapatigayon sang nasambit nga komitiba sa komunidad pahayag sang konsehal, 18 sa 24 ka mga ruta ang paga-amyendaran apang nakadepende na sa LTFRB kun ini ang aprubahan.
Nagalaum ang natungdan nga antes pa man magbukas liwat ang klase, mahitso na ang mga ruta sa syudad.
Sa tion nga makakuha sang final feedback ang komitiba halin sa publiko pinaagi sa transport summit, ipasa gilayon sang Iloilo City Government ang amended LPTRP sa LTFRB.
Ginhikayan ni Iloilo City Councilor Plaridel Nava ang resolusyon nga ginpasar ni City Councilor Atty. Sedfrey Cabaluna nga nagaduso sang pagpatigayon sang transport summit.
Sa interview sang Bombo Radyo kay Councilor Nava, gintawag sini nga ridiculous ang resolusyon bangud kaangay nga ginaako sang syudad nga palpak ang pagpatuman sang Local Public Transport Route Plan (LPTRP) sang syudad.
Suno pa kay Nava, tampa ini sa nawong sang mga opisyal bangud nga ginpaantos anay ang mga pumuluyo antes ginhatagan sang konsiderasyon nga pamatian ang ila mga concerns kag reklamo batok sa LPTRP.
Nagdepensa naman ang anay chairman sang Committee on Transportation nga si Atty. Rommel Duron kasunod sang pahayag ni Nava.
Sa interview sang Bombo Radyo kay Duron, iya ginpahayag nga wala gindali-dali ang pagpasar sang LPTRP sa syudad.
Suno kay Duron, sa pagkamatuod, naglawig sang duha ka tuig ang ginpatigayon nga serye sang konsultasyon nga gintambungan man sang tanan nga sektor antes ginpasar ang LPTRP.
