ILOILO CITY – Gindeklarar na sang World Health Organization (WHO) nga isa ka global health emergency ang monkeypox outbreak nga nag-apekto na sa halos 16,000 ka tawo sa 72 ka mga pungsod sa bilog nga kalibutan.
Suno kay WHO chief Tedros Adhanom Ghebreyesus, nadesisyunan niya nga ang global monkeypox outbreak ang nagarepresentar sang isa ka public health emergency nga isa ka international concern.
Dugang pa niya, ang committe of experts nga nagsapol sang Huwebes ang wala nakatigayon nga maglab-ot sa amo nga consensus gani natuon sa iya ang pagdesisyon kun bala mapagwa sang highest alert.
Sa assessment sang WHO, ang risgo sang monkeypox ang moderate gid lamang sa bilog nga kalibutan kag sa tanan nga rehiyon magluwas gid lamang sa European region sa diin, ang risgo ang tuman ka taas.
Ang monkeypox ang naka-apekto sa masobra 15,800 ka tawo sa 72 ka pungsod base sa tally sang US Centers for Disease Control and Prevention (CDC) nga gin-publish sang Hulyo 20.
Ang surge sang monkeypox infections ang gin-report humalin pa sang Mayo sa gwa sang West kag Central African countries sa diin ang balatian ang madugay na nga nangin endemic.
Sang Hunyo 30, ang WHO ang nag-convene para sa isa ka emergency committee (EC) sang mga eksperto agud nga magdesisyon kun bala ang monkeypox ang mahimo na nga makonsiderar bilang isa ka Public Health Emergency of International Concern (PHEIC) nga amo ang pinakamataas nga alert level sang UN health agency.
Apang madamo ang nagpanugyan kay Tedros nga sa subong nga sitwasyon nga wala pa nalab-ot ang threshold.
Ang ikaduha nga meeting ang ginpatigayon sang Huwebes sa diin, nagataas na ang kaso kag nagpabutyag na si Tedros sang kabalaka.
Suno naman kay Lawrence Gostin, director sang WHO Collaborating Center on National and Global Health Law, kinahanglan na nga magdeklarar sang highest alarm bangud sang nagataas nga kaso kag kapaslawan sa pag-akto ang mahimo nga mag-epekto sang grave consequences sa global health.
