Pilirmahan na lang ni Iloilo City Mayor Jerry Treñas kag sang SM Prime Holdings ang lease agreement para sa redevelopment sang Iloilo Central Market kag Iloilo Terminal Market sa idalom sang Public Private Partnership (PPP) scheme.
Ini matapos gin-isyu na sang alkalde ang Notice of Award pabor sa amo nga investor.
Sa interview sang Bombo Radyo sa alkalde, iya ginpahayag nga nagtakop ang Swiss challenge period nga wala sang nag-contest sa SM Prime Holdings nga amo ang una nga project proponent; buot silingon, wala sang iban nga investor nga nagkadto sa Iloilo City Government agud patasan ukon lapawan pa ang ginatanyag sang SM Prime Holdings.
Pagkatapos mapirmahan ang kontrata suno sa alkalde, igahatag ini sa Iloilo City Council para sa confirmation sang lease contract.
Ginalantaw sang Iloilo City Government nga masuguran na subong nga tuig ang re-development sang duha ka merkado sa syudad.
Ang PPP contract ang may yara sang 25-anyos nga validity; buot silingon, magabalik sa Iloilo Government ang pagdumala sa duha ka merkado matapos ang 25 ka tuig apang depende kun maga-renew ang private entity sang ila nga kontrata.
Ginpasalig man sang alkalde nga pangdal-on gid ang ang concerns sang mga manugbaligya sa duha ka merkado kun ipaidalom na ini sa PPP; buot silingon — wala sang legitimate nga market vendor nga ma-displace.
