Gintawag sang Philippine Army nga isa ka ‘old-school issue’ ang hazing kag indi dapat paggamiton nga rason nga pamatukan ang pagpatuman sang Reserve Officers’ Training Corps (ROTC) sa senior high school.
Sa interview sang Bombo Radyo kay Captain Kim Apitong, spokesperson sang 3rd Infantry Division sang Philippine Army, iya ginpahayag nga mas nagatutok subong ang mga manunudlo kag officers sang ROTC sa training kag briefing sa mga estudyante kag nagatudlo man sang disiplina kag patriotismo.
“Hazing at maltreatment… yung mga ganyan po, that’s an-old school issue na po. Wala na po yan sa ngayon sa ROTC. Ngayon po, we are focusing on training, lectures, briefing, practical, at syempre yung mga takbo-tabo kasi kailangan ‘yan eh. Yung mga hazing, wala na po ‘yan,” suno kay Apitong.
Matandaan nga sang 2002, kadungan sang pagpasar sang National Service Training Program (NSTP) Act of 2001 ukon Republic Act No. 9163,
nangin optional man ang ROTC sa mga eskwelahan. Ginbalay ang layi kasunod sang kamatayon sang sophomore cadet sang University of Santo Tomas nga si Mark Welson Chua sang 2001 matapos ginbuyagyag sini ang ginaalegar nga kurapsyon sa military training program sang eskwelahan. Sang amo nga tion, nag-rally ang grupo sang mga estudyante kag nagpanawagan nga i-abolish ang program.
Subong, nagtunog liwat ang panawagan nga ibalik ang amo nga programa kag mangin si President Ferdinand Marcos Jr. ang nagpahayag man nga lakip ang mandatory ROTC program sa senior high school students sa priority measures sang iya nga administrasyon.
Nag-guwa man sa survey sang Pulse Asia nga gin-komisyon ni Senator Sherwin Gatchalian nga 69% sang mga Pinoy ang pabor sa ROTC program para sa mga estudyante sa Grades 11 kag 12.
Suno naman kay Apitong, apisar nga wala man ginahandum sang bisan-o sin-o nga may matabo nga gyera, katungdanan gihapon sang kada isa nga pangapinan ang pungsod.
“It’s very important na that each individual marunong at may alam pagdating sa pag-depensa ng ating bansa. Hindi lang po ito para sa uniformed personnel. Responsibility po ito ng every Filipino citizen,” pahayag pa ni Apitong. ##
