Apisar sang kaakig sang China kasunod sang kontrobersyal nga pagbisita ni US House Speaker Nancy Pelosi sa Taiwan sang nagligad nga semana, nagpadala pa gid ang Estados Unidos sang five-member congressional delegation agud magpakigkita kay President Tsai Ing-wen.
Ang nasambit nga bipartisan group ang ginpangunahan ni Senator Ed Markey, Democrat of Massachusetts.
Subong nga adlaw, Agusto 15, natalana nga magsapol ang US lawmakers sa presidente sang Taiwan.
Sa subong, wala pa sang panibag-o nga sabat ang China sa panibag-o nga tikang sang Estados Unidos.
Ginalantaw sang analysts nga posible may “sharp reaction” ang Beijing kaangay sang pagdugang sang military exercises sa palibot sang Taiwan.
Bangud gina-claim sang China nga teritoryo pa sini ang Taiwan, ginpatigayon nila sang nagligad nga semana ang military drills sa palibot sang isla agud ipakita ang kaakig sa pag-abot ni Pelosi. Sa latest report sang Defence Ministry sang Taiwan, ginapahayag nga may 22 pa ka Chinese aircraft kag anum ka naval ships sa sulod kag sa palibot sang Taiwan Strait. ##
