ILOILO CITY – Wala sang may ginapili nga edad ang asthma kun mag-atake sa tawo.
Ang asthma ang naga-apekto sa baga sang tawo kag mangin sa alagyan sang hangin pakadto sa baga.
Sa interview sang Bombo Radyo kay Dr. Philip Ian Padilla, bata man ukon tigulang, mahimo gid nga maka-angkon sang asthma.
Masami nga mabatyagan sang asthmatic person amo ang pagkapin-ot sang dughan, mabudlay magginhawa kag may mabatian nga nagahuni.
Ini ang indi na madula kag nagatinir na sa lawas sang tawo.
Agud nga malikawan ini, dapat nga indi ma-expose sa mga allergen ukon sa mga nagapanigarilyo, sa yab-ok kag sa balahibo sang sapat.
Ang pinakamalala nga lebel sini amo nga indi na makaginhawa ang tawo, nagakalipong kag kinahanglan na nga dal-on sa ospital.
Sa tion nga mag-atake ini, may yara sang inhaler kag may yara man sang bulong para na sa mga delikado nga sitwasyon.
Magluwas sa exposure sa allergen, mahimo man ini nga mapanubli halin sa pamilya.
