Ginaplanuhan pa sang Department of Social Welfare and Development (DSWD) kun paano maabtan sang educational assistance ang mga indigent nga mga estudyante nga wala sang cellphones kag wala sang access sa internet.
Isa ini sa nakit-an nga problema sang ahensya kasunod sang duha ka Sabado nga paghatag sang educational assistance.
Suno kay Social Welfare Secretary Erwin Tulfo, wala sang load ukon mahina ang internet sang pila ka estudyante rason nga indi maka-register sa DSWD kag indi man maka-email. Daku ini nga problema bangud indi man pagbatunon sang DSWD ang walk-ins sa payout venue.
Magluwas diri, gin-ako man sang DSWD nga kulang ang pay-out sites sa pungsod.
Kada Sabado ang tagtaganay sini nga ayuda kag magatakop ini sa Septyembre 24.
Apang kun ipaanggid ang distribution sang Agusto 27 sa una nga pagpanagtag sang ayuda sang Agusto 20, may improvement na nga nakit-an suno kay Tulfo.
Ginpasalamatan sini ang Department of the Interior and Local Government (DILG) kag local government units (LGUs) sa pagbulig agud mangin mas matalunsay ang distribusyon sang educational assistance sa indigent so-called students-in-crisis.
Ginpahayag man sang ahensya nga P300 million ang educational assistance nga nahatag sa indigent learners sa duha ka Sabado nga distribusyon kun sa diin 66,000 tubtob 68,000 nga mga estudyante ang naserbisyuhan. ##
