Ginduso ni Senator Imee Marcos ang pagpatigayon sang comprehensive inventory sang local white onions agud mapat-od kun ano kadaku ang shortage sini sa Pilipinas.
Suno kay Senator Marcos, makabulig man ang inventory agud nga mahibaluan sang gobyerno kun may traders nga naga-hoard sang white onions.
Una na nga nagpahayag ang Department of Agriculture (DA) nga kulang ang suplay sang white onions sa mga merkado.
Suno sa DA, naumpisahan na sa paglista ang pangalan sang traders sa major onion-growing provinces kaangay sang Nueva Ecija kag Mindoro.
Suno naman kay Senator Marcos, bangud sa sini nga sitwasyon, naghingalit naman ang smugglers sang imported white onions kag nagbaligya sa restaurant industry sang white onions nga 10 ka pilo ang presyo.
May mga fastfood chains man nga nagareklamo nga tag-P400 per kilo na ang presyo sang white onions nga ginabaligya sa ila — tuman ka layo sa una nga presyo nga P40 per kilo.
Ginhingyo man ni Senadora sa DA nga ilakip sa inventory ang farmers sa Visayas kag Mindanao.
