ILOILO CITY – Ginpaggwa na sang Department of Foreign Affairs (DFA) ang mga topiko kag aktibidad ni Presidente Ferdinand (Bongbong) Marcos, Jr. sa duha ka mga state visits sa masunod nga semana.
Sa Indonesia, magasaksi sang pagpirma sang kasugtanan sa defense kag culture si Presidente Ferdinand (Bongbong) Marcos, Jr. upod kay Indonesian President Joko Widodo.
Magapadulong si Marcos sa Jakarta sa Septyembre 4-6.
Suno sa DFA, isa ka komprehinsibo nga plan of action nga magapakita sang bilateral priorities sang duha ka pungsod sa masunod nga lima ka tuig ang ginalauman nga pirmahan.
Lakip man sa istoryahan sang duha ka lideres sang pungsod amo ang dalagko nga isyu nga naga-apekto sa rehiyon kag sa bilog nga kalibutan.
Magapakigkita man si Marcos sa business leaders sa Jakarta kun sa diin ginalauman nga maga-promote sang trade and investment agud nga masuportahan ang economic agenda sang Pilipinas.
Ginalauman man nga iga-raise ni Marcos ang isyu sang oversease Filipino worker nga si Mary Jane Veloso nga sa subong yara sa death row.
Sa Singapore naman, pagapirmahan ang kasugtanan sa counter-terrorism kag data privacy.
Si Marcos ang mapadulong sa Singapore sa Septyembre 6-7 kasunod sang imbitasyon ni President Halimah Yacob.
Suno sa DFA, si Marcos kag si Singaporean Prime Minister Lee Hsien Loong ang maga-witness sang pagpirma sang kasugtanan.
Sa meeting niya upod kay Yacob kag Lee, ang mga lideres ang ginalauman nga maga-discuss sang relasyon sang duha ka Southeast Asian nations kag subong man ang regional kag global issues.
Ang business kag economic briefings ang patigayunon man kun sa diin, maga-imbitar si Marcos sang mga investors.
Magapakigkita man ang presidente sa Filipino community sa Singapore agud personal nga ipasalig sa ila ang padayon nga pagtinguha sang gobyerno nga mahatagan sang proteksyon ang ila kinamatarong.
Nahibaluan nga gin-imbitar ni Yacob si Marcos nga magbisita sa ila pungsod pila ka adlaw matapos nga nagdaog ini sa May 9 elections.
Si Yacob ang ulihi nga nagbisita sa Pilipinas sang Septyembre 2019.
