ILOILO CITY – Magapadulong na subong nga adlaw si President Ferdinand “Bongbong” Marcos Jr. sa Indonesia para sa iya pinakauna nga state visit.
Base sa advisory, ang una nga aktibidad sang presidente amo ang pagpakigkita sa Filipino community sa amo nga pungsod.
Suno sa Department of Foreign Affairs (DFA), magapasalig ang presidente sang commitment sang gobyerno agud nga maproteksyunan ang ila nga kinamatarong.
Bwas, Septyembre 5, makigkita si Marcos kay President Joko Widodo sa iya official residence nga ginatawag nga Bogor Palace nga nahamtang sa West Java.
Lakip sa mga aktibidad sang presidente amo ang masunod:
• Signing of a Plan of Action sa tunga sang DFA kag Ministry of Foreign Affairs of Indonesia nga magapakita sang kumprehinsibo kag action road map para sa bilateral relations sa masunod nga lima ka tuig;
• Renewal sang 1997 Agreement on Cooperative Activities in the Field of Defense and Security (DSCA) sa tunga sang Department of National Defense (DND) kag Ministry of Defense of Indonesia nga amo ang magaserber nga mother framework sa tanan nga defense kag security cooperation; kag
• Renewal sang Memorandum of Understanding on Cultural Cooperation sa tunga sang National Commission for Culture and the Arts (NCCA) kag Ministry of Education and Culture of Indonesia nga maga-promote sang people-to-people exchanges kag mutual understanding pinaagi sa cultural activities sang duha ka pungsod.
Indi paghambalan ang mga butang sa pulitika kag magatutok sa ekonomiya.
Makigsapol man siya sa mga business leaders agud nga mag-promote sang trade kag investment agud nga suportahan ang iya nga economic agenda.
Ginalauman man nga maga-discuss ang presidente sang concern sang pungsod sa West Philippine Sea.
Ang Indonesia amo ang masunod nga chairman sang Association of Southeast Asian Nations (ASEAN).
Ang duha ka pungsod ang lunsay may concern sa West Philippine Sea.
Samtang, indi pa sigurado kun ano ang mangin kapalaran ni Mary Jane Veloso, ang overseas Filipino worker (OFW) nga yara sa death row sa sulod na sang 12 ka tuig matapos nga nadakpan nga may 2.6 kilos sang heroin.
Suno kay DFA Secretary Enrique Manalo, posible nga i-tackle man ang nasambit nga issue sa state visit.
Sang Septyembre 2, personal nga nagkadto sa opisina sang Department of Migrant Workers (DMW) ang amay ni Veloso nagikan sa Nueva Ecija agud personal nga ihatag ang iya letter-appeal kay Marcos agud nga i-appeal ang kahilwayan sang iya anak.
Ginpili ni Marcos ang Indonesia bilang pinakauna nga state visit bilang ika-17 nga presidente sang Pilipinas agud nga i-solidify ang diplomatic ties sang pungsod sa may pinakadako nga ekonomiya sa Southeast Asia.
