ILOILO CITY – Gin-aprubahan na sa third and final reading sa 14th Sangguniang Panlalawigan sang Iloilo ang Provincial Ordinance No. 2020-219.
Ang tig-ulo sang amo nga provincial ordinance ang may tig-ulo nga “An Ordinance for the Creation and Institutionalization of the Iloilo Provincial Overseas Filipinos Migration and Development Center Under the Iloilo Provincial Public Employment Service” ukon ang “Iloilo Provincial OFMD Center”.
Sa interview sang Bombo Radyo kay 4th District Board Member Rolando Disturam, author kag sponsor sang amo nga provincial ordinance, iya ginpahayag nga ang Iloilo Provincial OFMD Center ang magaserbe nga information hub sang mga Ilonggo migrants and workers kag mangin venue man para sa pag-discuss sang mga isyu may kaangtanan sa migration kag development kag pila pa ka mga programa kag mga serbisyo apang indi limitado sa information tools kag Information, Education, and Communication (IEC) materials.
Magahatag man ini sang serbisyo para sa safe migration kag reintegration sang migrants sa tion sang kinagamo, giyera, economic depression, biological hazard, maltreatment ukon human rights violation, employment contract violation, kag iban pa.
Ang dugang pa nga benepisyo sini amo nga magahatag ini sang economic opportunities paagi sa pagpatigayon sang employment kag livelihood assistance kag pagpakig-angot sa provincial local economic and development and investment promotions unit para sa community enterprise paagi sa investment and incubation center for micro-enterprise development.
Magluwas sina, may yara man sang i-offer nga psycho- social services kag training opportunities para sa migrants kag sa ila nabilin nga pamilya sa bulig sang Provincial Social Welfare and Development Office (PSWDO).
Maga-develop sang database bilang sistema sa pag-monitor kag referral sang migrants kag sang ila pamilya sa magkatuhay nga stages sang migration nagikan sa pagbiya tubtub sa pag-abot sa lugar, pagbalik kag reintegration.
Maga-develop man ini sang kapabilidad sang magkatuhay nga stakeholders sa paghatag sang economic, social kag developmental services para sa migrants kag sa ila pamilya sa probinsya sang Iloilo.
Dugang pa ni Distura, madugay na kuntani ini nga ordinansa apang wala napadayon bangud sang pandemya.
