ILOILO CITY – Na-istoryahan nanday Foreign Affairs Secretary Enrique Manalo kag sang iya Indonesian counterpart nga si Retno Marsudi ang kaso ni Mary Jane Veloso nga yara pa subong sa death row sa amo nga pungsod.
Suno kay Press Secretary Trixie Cruz-Angeles, ginatinguha-an subong sang Department of Foreign Affairs (DFA) nga mapangitaan sang solusyon ang kaso ni Veloso nga convicted sa drug trafficiking matapos nga nadakpan sang 2.6 kilo sang droga sa Yogyakarta sang 2010.
Wala sang dugang nga detalye nga ginhatag si Cruz-Angeles.
Indi man makakumpirma si Cruz-Angeles kun bala, na-istoryahan man ang amo nga butang nanday President Ferdinand Marcos Jr. kag Indonesian President Joko Widodo.
Nahibaluan nga nagpangayo sang bulig ang pamilya ni Veloso kay Marcos nga mag-request sa Indonesian president nga hilwayon ang ila anak.
Si Veloso ang nasentensyahan sang death penalty sang 2010.
Ginpanginwala niya ang amo nga akusasyon batuk sa iya kag ginpanindugan nga ang mga nag-recruit sa iya ang naghatag sa iya sang suitcase nga may unod nga iligal nga droga.
Ang recruiter niya nga sanday Maria Cristina Sergio kag Julius Lacanilao ang ginpasakaan na sang kaso nga human trafficking, illegal recruitment kag estafa.
