Ginpirmahan ni President Ferdinand “Bongbong” Marcos Jr. ang Executive Order No. 3 nga nagapahanugot sang BOLUNTARYO LAMANG nga pagsuksuk sang face mask sa outdoor settings.
Sa idalum sang bag-o nga executive order, nakasaad nga ginapahanugutan ang optional nga paggamit sang face mask sa bukas nga mga lugar ukon open spaces amo man sa indi magutok nga mga area kun sa diin maayo ang ventilation; apang HIGHLY ENCOURAGED sa gihapon ang pagsuksuk sang face mask kag ang pag-obserba sang physical distancing para sa mga tawo nga indi fully vaccinated, sa senior citizens, kag sa immunocompromised individuals.
Sa amo man nga order, ginpahayag man nga dapat gihapon isuksuk ang face mask sa indoor, private or public establishments, lakip na sa public transportation kun sa diin masami nga nagadis-uganay ang mga tawo ukon wala sang physical distancing.
Suno pa kay Press Secretary Trixie Cruz-Angeles, dapat gihapon nga sundon ang iban pa nga minimum public health standards agud nga malikawan ang paglapta sang coronavirus.
Ginmanduan man ang Department of Health nga i-update ang minimum public health standards guidelines kasunod sang pagpaguwa sang Executive Order Number 3.
Effective immediately ang bag-o nga executive order sang presidente. ##
