ILOILO CITY – Magabiya subong nga aga si President Ferdinand Marcos Jr. padulong sa New York City para magtambong sang 77th United Nations General Assembly sa Septyembre 20.
Ini ang pinakauna nga in-person assembly humalin sang nag-igo ang pandemya.
Ini man ang magamarka sang pinakauna nga engagement ni Marcos sa United Nations kag ang ikatatlo nga overseas trip matapos ang madinalag-on nga state visits sa Indonesia kag Singapore.
Sa advisory sang palasyo, magahalin sa Ninoy Aquino International Airport Terminal 2 si Marcos, alas-8:15 sakay sa Philippine flag bearer nga airline.
Ang speech sang presidente sa assembly ang naka-schedule alas 3:15 sa hapon sa New York sa Septyembre 20 kag alas 3:15 sa aga naman sa Septyembre 21 sa Pilipinas.
Suno kay Foreign Affairs Assistant Secretary Kira Christianne Danganan-Azucena, mangin focus sang speech ang isyu sa climate change, the rule of law, kag food security.
Si Marcos ang maga-upod sa masobra sa 150 ka mga heads of state and government sa high-level general debate.
Suno naman kay Press Secretary Trixie Cruz-Angeles, ang primary purpose sang overseas trip sang presidente amo ang pagtambong sa general assembly kag wala sang announcement apang posible nga makigkita ini sa Filipino community kun may tyempo.
Natalana man ini nga magsapol sa United States Chamber of Commerce kag pila pa ka business groups sa Estados Unidos kag mangin sa Association of Southeast Asian Nations Business Council, kag sa United States-Philippine Society.
Ang economic briefing ang may katuyuan nga maka-attract sang investors, senior corporate executives, business analysts, kag academic think tanks.
Ang mga economic managers ang mahimo nga maka-upod sa mga private business leaders agud nga hambalan ang pila ka mga isyu.
Ini ang mangin opurtunidad agud nga ma-outline ang key economic priorities sang Marcos administration nga may special focus sa kun paano ma-expand kag mapabaskog ang Philippine-United States trade and investment relations sa tion sang iya administrasyon.
Ang delegasyon sang Pilipinas sa trip kag related meetings ang ginalakipan sang pinuno sang Department of Foreign Affairs, Department of Trade and Industry, Department of Finance, National Economic and Development Authority, kag Department of Migrant Workers.
May yara sang 20 tubtob 30 ka mga senior Philippine corporate executives nga maga-upod suno kay Department of Foreign Affairs Assistant Secretary JV Chan Gonzaga.
Ang trip ni Marcos sa Estados Unidos ang kasunod sang iya state visits sa Indonesia kag Singapore sang Septyembre 4 tubtub 7.
Una na nga ginpahayag sang opisyal sa Estados Unidos nga mahimo nga magbisita sa ila pungsod si Marcos nga indi pag-arestuhon bangud nga ang mga heads of state ang may yara sang diplomatic immunity.
Si Marcos kag ang iya pamilya ang subject sang $353-million contempt order sa Estados Unidos may kaangtanan sa human rights class suit.
