ILOILO CITY- Nagsaka pa sa 11 ka kabataan nga estudyante sa isa ka eswelahan sa Myanmar ang nagkalamatay sa ginpatigayon nga air strike sa pila ka civilian areas, kalakip na ang eskwelahan sa Tabayin Township, Sagaing Region.
Ang amo nga pagpang-atake ang ginpatigayon sang military junta sang pungsod kag ang target kuntani amo ang mga rebelde nga nagapanago sa area.
Suno kay Bombo Jobert Pahilga, Bombo International Correspondent sa Myanmar kag International Adviser of the United Nations sa amo nga pungsod,magluwas sa nagkalamatay, may 15 ka iban pa nga kabataan nga nagapabilin nga missing matapos ang pagpang-atake kag ginapahayag nga ginpangdakop sang mga militar.
Sa statement naman sang junta, ila ginpahayag nga nagpadala sila sang tropa sakay sa helicopters padulong sa Let Yet Kone village matapos nakabaton sang impormasyon nga nagatago sang mga armas sa lugar ang mga fighters gikan sa Kachin Independence Army (KIA), isa ka ethnic rebel group.
Gin-akusahan sang military ang rebel fighters nga ginagamit ang mga sibilyan bilang human shields.
Ginpanginwala naman sang junta nga sila ang nagpamatay sa mga bata kag gintudlo ang mga rebelde nga may kahimuan sang mass child murder.
