ILOILO CITY- Gin-athag sang Department of Public Works and Highways Region 6 nga may yara sang ililigan sang tubig sa Ungka flyover apang natabunan lang bangud sa ginhimo nga asphalt overlay.
Sa interview sang Bombo Radyo kay Engineer Jose Al Fruto, Assistant Regional Director sang Department of Public Works and Highways, iya ginpahayag nga sa subong, ginaubra na nila ini agud nga mabalik ang mga downsprouts agud may yara sang iligan ang tubig kag indi magsupon sa tion nga magbubo ang ulan.
May kaangtanan naman sa pagpatigayon sang temporary shoring sa Ungka flyover bangud sa nakit-an nga vertical displacement ukon nagausmod nga porsyon sang istruktura, ginpahayag ni Fruto nga naumpisan na ini subong nga adlaw.
Apang suno sa iya, ang nadiskubrehan nga displacement ang yara saa Pier 4,5 kag 6 gani magalawig pa ang pagsirado sang Ungka Flyover nga nagsugod pa sang Septembre 18.
Tinutuyo sang temporary shoring nga matukudan ukon ma- punggan ang pag-usmod sang tatlo ka pier nga nakitaan sang displacement.
Ginabanta posible magalawig sang dugang nga 3 ka semana ang closure bangud sang installation sang materyales sa shoring.
Suno pa kay Fruto, katuyuan sang pagsirado sang flyover amo ang pagpasiguro sang safety sang motorista samtang nagapadayon ang inspection.
