ILOILO CITY- Ginpangabay ni Iloilo City Mayor Jerry Treñas ang Department of Public Works and Highways Region 6 nga padasigon ang pag-rehabilitate sa bag-o nga Ungka flyover.
May kaangtanan ini sa nakit-an nga vertical displacement sa flyover rason nga ginbaha ini kag may nakit-an man nga mga litik sa istruktura.
Sa interview sang Bombo Radyo kay Mayor Treñas, iya ginpahayag nga sa iya pagpakigsapol upod sa Assistant Regional Director sang ahensya nga si Engr. Jose Al Fruto kag iban nga stakeholders, ginplastar ni Fruto nga magalawig sang isa ka bulan kag tunga ang ila pagrehabilitate sa flyover.
Suno sa alkalde, ginpasiguro man sang Department of Public Works and Highways Region 6 nga wala sang isyu sa safety sang publiko samtang ginapatigayon ang pagkaayo sa nakit-an nga mga problema sa istruktura.
Nahibaluan nga umpisa sang Septyembre 18, ginpasirado ini sa mga motorista.
