ILOILO CITY- Ginapahayag nga indi magpasugot ang legal counsel ni Jevron Parohinog nga magpa-interview ini sa National Bureau of Investigation.
Sa interview sang Bombo Radyo kay Atty. Jeremiah Sargado, Assistant Regional Director sang National Bureau of Investigation Region 6 nga nagapatigayon sang parallel investigation sa Estancia Massacre, iya ginpahayag nga nakabaton sila sang amo nga impormasyon nga gindumilian ni Atty. Hector Teodosio si Parohinog nga maghatag sang statement sa amo nga ahensya.
Apang suno kay Sargado,sa ila una nga request kay Teodosio sadto, nagpasugot man ini.
Sa tion nga indi gid man magpasugot si Teodosio, ginpahayag ni Sargado nga maga-pagwa nalang sila sang subpoena kay Parohinog.
Sa subong, gina-finalize na sang ahensya ang documentation kun matigayon gid man nga magpasugot ang kampo ni Parohinog nga ma-interview ini sang National Bureau of Investigation.
Samtang, may yara naman sang ginauyatan nga pito ka affidavits ang ahensya–sa pito, tatlo diri ang mga myembro sang pamilya sang napatay samtang ang apat ka affidavits ang wala na ginpangalanan ni Sargado.
Magluwas sa pito, may isa pa ka affidavit nga gina-finalize.
