ILOILO CITY- Nasapwan nga nagabitay sa sanga sang paho kag wala na sang kabuhi ang isa ka lalaki sa San Fernando,Barotac Viejo, Iloilo.
Ang biktima amo si Perl John Agcalare,20, residente man sang amo nga lugar.
Sa interview sang Bombo Radyo kay PMSGT Rodolfo Prudente Jr., chief investigator sang Barotac Viejo Municipal Police Station, iya ginpahayag nga madamo sila sang ginalantaw nga posibilidad kun ngaa nagpanginmatay ang amo nga lalaki.
Suno kay Prudente, nagaisahanon na lang ini sa kabuhi bangud nga halin ini sa isa ka broken family.
Pahayag niya, may yara man sang nagapaeskwela kay Prudente apang ginapahayag nga may yara sang indi pag-intindihinay nga nagpatunga sa ila nga duha.
Apang sa pihak sang pila ka ginasundan nga anggulo sa pagpanginmatay sang lalaki, ginpahayag ni Prudente nga wala nila ginadula ang posibilidad nga may foul play sa likod sang kamatayon sang biktima ilabi na nga nagaduot sa duta ang tiil sini bangud manubo lang ang sanga kun sa diin ini nagbitay.
