Para kay Presidente Ferdinand ‘Bongbong’ Marcos Jr., ang pagbyahe sa Singapore para sa Formula One (F1) Grand Prix amo ang pinaka-maayo nga paagi agud makakuha sang dugang nga negosyo para sa Pilipinas.
Ginpahayag ini sang presidente kasunod sang iya nga weekend trip sa Singapore kag kasunod man sang pagpakamalaot nga nabaton halin sa publiko bangud ginapahayag wrong timing sini.
Mismo si Marcos ang nag-post sang iya pictures sa amo nga event kagab-i, Oktubre 3.
“They say that playing golf is the best way to drum up business, but I say it’s Formula 1. What a productive weekend!,” pahayag sang presidente.
Ginpahayag man sini nga ‘fulfilling’ nga maimbitaran kaupod ang iban pa nga dignitaries kag nangin paagi ini agud nga makilala niya ang iban pa nga negosyante nga nagpabutyag sang interes nga mag-invest sa Pilipinas.
Lakip sa personalities nga nakit-an nga kaupod sang presidente sa exclusive F1 Paddock Club amo sanday Singaporean Prime Minister Lee Hsien Loong kag Singaporean Manpower Minister Tan See Leng.
Natalana man nga sabton sang Malacañang ang mga pamangkot kun official trip ang amo nga escapade kag kun ngaa ginsekreto ini sa publiko.
May report nga nagpahayag nga gingamit ni Marcos ang presidential jet sa escapade, kag yara man sanday First Lady Liza Marcos, anak nga si Ilocos Norte Rep. Sandro Marcos kag ang iya rumored girlfriend nga si Alexa Miro.
Nakit-an man sa F1 Paddock Club sanday House Speaker Ferdinand Martin Romualdez, asawa nga si Tingog Party-list Rep. Yedda Romualdez kag Cavite Rep. Aniela Tolentino.
‘GINGAMIT BALA ANG PRESIDENTIAL JET?’
Categorical answer naman ang gusto ni ACT Teachers Party-list Rep. France Castro: “Dapat nga athagon sang Malacañang kag Armed Forces of the Philippines kun gingamit ukon wala ang G280 Gulfstream ukon ang command and control aircraft sang Philippine Air Force.”
Kun matuod suno kay Castro nga naggamit ang presidente sang government resources sa iya “personal, extravagant, kag frivolous junket” nga kadungan man sang kabudlayan nga ginaagyan sang mga Pinoy, buot silingon sini suno sa mamalidha, daku ini nga insulto para sa mga tawo nga ginagutom.
Pahayag pa sini, bisan opisyal pa ang byahe sang presidente, wrong timing ini gihapon bangud bag-o lang naglabay ang Bagyo Karding sa Luzon kag wala pa sang tion si Marcos nga magbisita sa mga pamilya sang mga biktima.
Ginapasid-ing sini ang government jet nga gingamit sa trip ni Marcos. Kun mapamatud-an suno sa iya nga gingamit ang presidential jet, buot silingon, gingamit gid ang kaban sang gobyerno.
“As it is his whole Singapore GrandPrix trip is insensitive and callous in light of the suffering of Filipinos,” pahayag sang mamalidha.
Kun basehan naman flight tracker website nga Flightaware, nakit-an nga nag-abot ang G280 Gulfstream sa Singapore Changi Airport sang Sabado, Oktubre 1, sang 4:16 p.m. Naghalin ini sa Manila sang 1:03 sang hapon sang amo nga adlaw. Sang Lunes, Oktubre 3, nagbiya na ang amo nga aircraft sa Singapore kag nag-abot sa Manila takna 3:26 a.m. ##
