Halin sa isyu sang kidnapping tubtub sa human trafficking tubtub sa murder, may panibag-o naman nga issue nga naangot sa Philippine Offshore Gaming Operators (POGO) — ang gina-alegar paglapta sang sexually transmitted diseases (STDs) sa mga empleyado.
Suno kay Department of Justice (DOJ) Assistant Secretary and Spokesperson Jose Dominic F. Clavano IV, nakabaton sang reports ang ahensya nga nagalapta ang amo nga balatian sa POGO firms.
Wala sang dugang nga detalye kun ano na kasangkad ang paglapta sang balatian sa mga empleyado apang ginapahayag nga may 15 tubtub 20 na ka kaso.
Ginmanduan na ang National Bureau of Investigation (NBI) nga ideterminar ang full extent sa sini nga isyu.
Ginsulit man sang ahensya nga natalana na nga i-cancel sang Bureau of Immigration (BI) ang visa sang 48,782 Chinese kag iban pa nga foreign nationals nga nagatrabaho sa POGOs nga may lisensya nga kanselado na nga daan sang Philippine Amusement and Gaming Corporation (PAGCOR).
Bangud sini, hatagan sang 59 ka adlaw ang Chinese workers nga maghalin sa Pilipinas kun makanselar na ang ila visa. Patigayunon ang summary deportation kun magpamalibad sila nga magbiya sa sulod sang amo nga period apisar nga kanselado na ang ila visa. ##
