ILOILO CITY – Nag-fire sang tear gas ang mga pulis sa Haiti sa tunga sang linibo ka mga protesters nga naga-martsa sa dalanon sa capital nga Port-au-Prince batuk sa gobyerno ni Prime Minister Ariel Henry.
Ini ang bangud sang indi maayo nga pagdala sang kakulang sang produktong petrolyo kag sa nagasaka nga presyo sini.
May yara sang isa ka lalaki nga ginkarga sa stretcher bangud sa leg injury tuga sang tear gas kag pagpalupok sang pulis agud nga matabog ang mga protesters.
Ang pagpataas sang presyo sang gatung ang gin-anunsiyo ni Henry sang nagligad nga bulan nga nagresulta sa pagpasirado sang pila ka mga ospital nga nagasalig sa mga diesel generators kag dako nga hu-ol sa transport sector.
Ang protesta ang ginpatigayon kadungan sang pagbukas sang klase matapos ang isa ka bulang nga pagsuspender sini bangud sang economic crisis.
Suno sa pila ka mga protesters, wala sang problema sa pagbukas sang klase kun masolbar sang prime minister ang insecurity, kagutom, gang problems kag ang krisis.
Nagpanawagan man ang mga ini kay Henry nga magpanaog sa pwesto.
Kung madumduman, sa United Nations General Assembly, gin-acknowledge ni Henry ang kinamatarong sang tawo nga magprotesta apang ginkondenar naman ang pagpangawat, vandalism kag kinagamo.
Nahibaluan nga pito ka mga tawo ang napatay bangud sa cholera nga nagapakita lamang nga may yara sang problema sa access sa matinlo nga tubig.
