ILOILO CITY – Nagdepensa ang Malacañang sa Singapore trip ni President Ferdinand “Bongbong” Marcos, Jr. agud nga magtambong sang Formula 1 racing event.
Suno kay Executive Secretary Lucas Bersamin, dapat nga indi pagkabalak-an ang gasto sa trip sang presidente bangud gintungdan sa gihapon ni Marcos ang iya trabaho bilang Chief Executive.
Gin-ako ni Bersamin nga ang nangin lakat sang presidente ang indi official state visit.
Suno pa sa iya, nagpakigkita ang presidente sa pila ka mga tawo nga makabulig sa negosyo sa Pilipinas.
Indi na importante suno sa iya kun ang lakat ni Marcos ang fully paid ukon indi.
Ginpahayag pa niya nga wala siya nakahibalo sa funding sang amo nga unofficial state visit.
Sang ginpamangkot naman kun ngaa nga ginsekreto lamang ang lakat sang presidente, ginpahayag ni Bersamin nga nagahalong lamang ang presidente sa seguridad.
Posible nga may magabantay sa iya sa Singapore.
May mga butang suno sa iya nga indi mahimo nga isapubliko.
Apisar nga indi official visit, nagpanindugan si Bersamin nga importante ang nangin lakat sang presidente.
Ginpahayag man ni Bersamin nga wala sang problema kun public funds ang gingamit sa trip ni Marcos bangud nga para man ini sa interes sang Pilipinas.
Indi man ini paglapas sa Republic Act No. 6713 ukon ang Code of Conduct and Ethical Standards for Public Officials and Employees bangud nga ang presensya ni Marcos sa Formula 1 Grand Prix ang makadugang sang significance sang amo nga event.
Suno sa iya, ang presidente ang nangin isa ka matinee idol sa tion nga magkadto sa event bangud ang iya nga presensya ang makaganyat sang dugang nga audience.
Lakip sa personalities nga nakit-an nga kaupod sang presidente sa exclusive F1 Paddock Club amo sanday Singaporean Prime Minister Lee Hsien Loong kag Singaporean Manpower Minister Tan See Leng.
Nakit-an man sa F1 Paddock Club sanday House Speaker Ferdinand Martin Romualdez, asawa nga si Tingog Party-list Rep. Yedda Romualdez kag Cavite Rep. Aniela Tolentino.
May report nga nagpahayag nga gingamit ni Marcos ang presidential jet sa escapade, kag yara man sanday First Lady Liza Marcos, anak nga si Ilocos Norte Rep. Sandro Marcos kag ang iya rumored girlfriend nga si Alexa Miro.
