Gin-file na ni Senate Minority Leader Aquilino ‘Koko’ Pimentel III ang resolusyon nga nagaduso nga imbestigaran sang Senado ang ‘integrity and trustworthiness’ sang lotto games sang Philippine Charity Sweepstakes Office.
Ini nga Proposed Senate Resolution No. 253 ang kasunod sang kontrobersyal nga pagdaog sang 433 ka manugtaya sa jackpot sang 6/55 Grand Lotto draw sang Sabado sang gab-i.
Gin-lunsar sang PCSO ang online lottery sa Pilipinas sang Enero 1995. Mas naunahan pa sang lotto ang popularidad sang sweepstakes ticket sales kag amo na subong ang ginakabig nga flagship game sang PCSO.
Sang Hulyo 2019, matandaan nga nagmandu si anay Presidente Rodrigo Duterte nga i-shutdown ang operasyon sang lotto sa tunga sang mga alegasyon sang anomaliya kag kurapsyon.
Ginsaad ni Pimentel sa iya nga resolusyon ang kakulang sang transparency.
Bangud wala man ginabuyagyag kun sin-o ang nagadaog, nagaduda ang mga tawo suno sa senador.
Isa pa sa talalupangdon suno kay Pimentel amo ang lag time sa tunga sang pag-anunsyo sang resulta kag ang pag-anunsyo sang numero sang nagdaog. Nagasuspetsa man ang publiko suno sa senador nga ginagamit ini nga lag time agud nga manipulahon kag i-insert ang lucky bettors sa lista sang mga tagdaog.
Ginpahayag nga ang pinaka-kontrobersyal sa tanan amo ang pagdaog sang 433 gid ka manugtaya– butang nga ginlaragway ni Pimentel nga contender na para sa Guinness Book of World records.
Una na nga nag-depensa ang PCSO officials sa pagdaog sang 433 jackpot bettors. Gintawag ini sang opisina nga unprecedented apang “natural occurrence” kag wala sang iregularidad. ##
