ILOILO CITY- Pamilya kag sitwasyon sa kabuhi ang nangin inspirasyon sang Ilongga nga rank #1 sa Fisheries Technologist Licensure Examination.
Ini amo si Jean Margaret Gelladuga Badong, graduate sa Iloilo State College of Fisheries-Barotac Nuevo kag nakakuha sang rating nga 86.25% sa amo nga pasinawan.
Magluwas kay Badong, yara man sa rank #1 si John Rey Fortu Rasgo nga graduate sang University of the Philippines Visayas.
Sa interview sang Bombo Radyo kay Badong nga tumandok sang Brgy. Poblacion, Carles, iya ginpahayag nga motibasyon niya sa kabuhi amo ang iya ginikanan kun sa diin ang iya amay ang nasunog bangud sa isa ka aksidente sadto rason nga naapektuhan gid ang ila pagpangabuhi, samtang ang iya iloy ang nagalibod lang sang lumpia kag iban nga pagkaon agud nga makakwarta.
Suno kay Badong, antes ang pagkuha nila sang pasinawan upod sa iya mga classmates sang Oktubre 6-7, nagapangduha-duha pa ini kun makapasar bangud nga sang Agusto lang sila nag-graduate.
Dugang niya, samtang nagakuha sang exam, wala na ini naglaum nga makapasar bangud may mga pamangkot nga wala gid nila matun-an gani ginhanda na lang niya ang iya kaugalingon nga magkuha sang exam sa masunod nga tuig.
Apang sa pihak sini, nagapati si Badong nga pagbuot gid ini sang Mahal nga Diyos bangud nga saksi Ini kun paano siya nagtinguha kag nagpangabudlay agud makatapos sa pag-eskwela kag sa handom nga mabuligan ang iya pamilya sa tion nga makapangita na sang trabaho.
Nahibaluan nga si Badong ang nag-graduate bilang cum laude kag scholar man ini sang Bureau of Fisheries and Aquatic Resources.
