ILOILO CITY- Apisar naglain ang pamatyag sa adlaw mismo nga nagkuha sang pasinawan, nangin rank #1 pa sa Fisheries Technologist Licensure Examination si John Rey Fortu Rasgo nga graduate sang University of the Philippines Visayas- Miagao Campus sa Miagao, Iloilo.
Sa interview sang Bombo Radyo kay Rasgo nga tumandok sang Sta. Fe, Romblon, iya ginpahayag nga sang nagakuha na ini sang exam, hinali lang nga may nabatyagan ini nga indi maayo sa iya lawas kag sang ginhatagan ini sang rosarito sang iya abyan, nahatagan ini sang kusog nga tapuson ang ginakuha sang exam.
Suno kay Rasgo, ang iya pagkuha sang kurso nga Fisheries ang handom gid sang iya mga ginikanan kun sa diin ang iya amay isa man ka Fisheries Technologist nga nagatudlo sa Romblon State University kag isa man ka manunudlo ang iya iloy.
Pahayag pa ni Rasgo, bangud sa impluwensiya sang iya ginikanan, luyag man nita nga sundan ang tapak sang mga ini bilang isa ka manunudlo.
Sa pagkamatuod, samtang nagapreparar ini para sa licensure exam, nagatudlo na nga daan ini sa isa ka unibersidad sa Sorsogon,kag bangud sa kasakuon, wala ini naglaum nga mangin topnotcher.
