ILOILO CITY- Magapatawag man sang kaugalingon nga inquiry meeting may kaangtanan sa kontrobersyal nga Ungka Flyover si Iloilo City Councilor Johnny Young nga chairman sang Committee on Engineering, Construction and Public Works sa City Council.
Sa interview sang Bombo Radyo kay Councilor Johnny Young, sa amo nga inquiry, ipatawag man niya ang mga tiglawas sang Department of Public Works and Highways kag contractor sang Ungka flyover nga amo ang International Builders Corporation.
Gin-athag ni Young nga ini nga inisyatibo niya ang lain man sa ginpatawag ni Iloilo City Councilor Sedfrey Cabaluna nga chairman naman sang Committee on Transportation.
Suno kay Young, ang ini nga concern ang dapat sa idalom gid sang iya kumitiba kag ini ang direkta nga dapat magpangita sang solusyon sa problema.
Sa subong, wala pa sang na-set nga petsa para sa amo nga inquiry.
Gindugang man niya nga indi man kinahangalan nga pasudlon ini sa agenda sang ila regular session bangud indi pa man ini makabig nga commitee hearing.
