ILOILO CITY- Natapos na sang National Bureau of Investigation Region 6 ang documentation may kaangtanan sa motibo sa pagpatay sa tatlo ka mga biktima sa ginbansagan Estancia Massacre.
Sa interview sang Bombo Radyo kay Atty. Jeremiah Sargado, Assistant Regional Director sang National Bureau of Investigation Region 6, iya ginpahayag nga natumod na nila ang motibo sa krimen apang nagpamalibad ini nga ipalayag ang ginasundan nila nga motibo.
Suno kay Sargado, may mga witnesses naman nga nakuha apang padayon pa ang ahensya sa pagpangita pagid sang dugang nga testigo agud mas mapapag-on pa ang kaso.
Dugang niya, nakapadala na man sila sang request sa mga telecommunications companies para ma-check ang mga call logs sa mga cellphones sang mga biktima.
Samtang, ginkumpirma ni Sargado nga indi na pagtugutan si Jevron Parohinog sang iya legal counsel nga si Atty. Hector Teodosio, nga maghatag pa sang statement sa National Bureau of Investigation.
Si Parohinog ang ginakabig nga person of interest sa krimen kun sa diin patay ang iya mga abyan nga sanday JP Bosque, Chrysler Floyd Fernandes, kag Mark Libao.
