ILOILO CITY – Ginabanta P2 billion ang “under-declared” tax obligations sang Philippine Offshore Gaming Operators subong gid lamang nga tuig.
Ini ang suno kay Senator Sherwin Gatchalian.
Ang tax leakage suno kay Gatchalian ang natukiban sa ginpatigayon niya nga kaugalingon nga pagpanalawsaw base sa settled gross gaming revenues sang Philippine Offshore Gaming Operators sa Bureau of Internal Revenues kag Philippine Amusement and Gaming Corporation.
Suno kay Gatchalian nga amo ang chairman sang Senate ways and means committee, dapat nga makakolekta ang gobyerno sang mas dako nga buwis kag fees nagikan sa lehitimo nga mga casino.
Sa iya computation, ang lehitimo nga Philippine Offshore Gaming Operators ang may estimated tax leakage nga P1.9 billion kun basehan ang discrepancy sa gross gaming revenue nga gin-report sang Bureau of Internal Revenues kag Philippine Amusement and Gaming Corporation humalin sa January tubtob August 2023.
Suno naman kay Senate Minority Leader Aquilino “Koko” Pimentel III, ang projected income sang gobyerno nagikan sa Philippine Offshore Gaming Operators sa tion sang ila nga conceptualization period ang ginabanta nga yara sa tunga-tunga sang P30 billion tubtob P40 billion nga baliskad sa actual collection nga yara lang sa ginabanta P3 billion tubtob P5 billion.
Dugang pa niya, ang findings ni Gatchalian ang nagapakita lamang nga wala sang ginansya ang Pilipinas nagikan sa Philippine Offshore Gaming Operators.
Sang nagligad nga semana, ginpahayag man ni Senator Imee Marcos nga ang lease sang Philippine Offshore Gaming Operators sa pungsod ang tubtob pa sa duha ka tuig.
