ILOILO CITY- Nakapauli na sa ila balay ang isa ka lalaki nga nagtuyo nga mag-utas sang kaugalingon nga kabuhi sa sulod sang lodge sa Nabitasan, La Paz, Iloilo City.
Ang biktima amo si alyas Rolly,38,residente sang Leon, Iloilo nga may pilas sa iya tuo nga kamot kag ginpahayag nga naglaslas ini sang pulso.
Sa interview sang Bombo Radyo kay PMaj Jose Val Ladublan, hepe sang La Paz Police Station, iya ginpahayag nga 12 ka oras na nga yara sa sulod sang gin-arkilahan nga kwarto ang biktima rason nga ginkadtuan ini sang personnel sang lodge.
Didto kag naabtan sang roomboy ang lawas sang biktima nga duguon kag wala na sang pangalibutan nga nagahigda sa kama.
Madasig man nga ginrespondehan sang emergency responders ang biktima.
Suno kay Ladublan, antes nag-check in ang biktima, una na ini nga nag-check in upod sa isa ka babaye kag naggwa man sila, apang makaligad ang pila ka oras, nagcheck-in liwat ang lalaki apang nagaisahanon na lang.
Naggwa sa imbestigasyon nga problema sa pamilya ang rason sang pagtuyo nga pagpanginmatay sang lalaki.
Nahibaluan nga nagatrabaho sa luwas sang pungsod ang iya asawa kag may duha sila ka anak apang ginpahayag nga nakigbulag na ang iya asawa.
