Gin-athag sang pamilya sang beterano nga brodkaster nga si Percy Lapid nga indi magkadto sa self-confessed gunman ang P6.5 million nga reward money nga ginpasalig anay para sa makahatag sang impormasyon may kaangtanan sa mga suspek.
Sa interview sang Bombo Radyo kay Roy Mabasa, isa ka journalist kag utod man sang ginpatay nga si Lapid, iya ginpahayag nga sa subong, ginpasalig nga ihatag ang kuwarta sa tawo nga makatudlo sa tatlo ka iban pa nga kaupod sini nga nag-patay sa biktima sang Oktubre 3.
Ginpaguwa naman sang mga pulis ang mga nawong sang tatlo nga amo sanday Edmon Dimaculangan, Israel Dimaculangan, kag ang certain “Orly” ukon “Orlando” nga wala pa sang full name.
Una na nga ginpahayag ni Interior Secretary Benjamin “Benhur” Abalos Jr. nga nag-surrender ang self-confessed shooter nga si Joel Salve Escorial bangud sa kahadlok sa iya nga personal safety kag matapos nga nag-release ang pulisya sang kopya sang closed circuit television camera footage kag sang P6.5 million bounty.
Una naman nga ginpahayag ni Escorial nga may tawo halin sa Bilibid ukon sa New Bilibid Prison nga nagmandu sa ila nga patyon ang beterano nga brodkaster.
Subong nga adlaw naman natalana nga magpaguwa sang resolusyon ang Department of Justice kaangot sa murder complaint nga gin-file batok sa mga suspek.
