ILOILO CITY- Nagdangat sa ₱714,000 ang balor sang 105 grams nga narekober nga iligal nga droga sa mag-utod sa ginpatigayon nga drug buy-bust operation sang otoridad sa Zone 3, Brgy. Lopez-Jaena Norte, La Paz, Iloilo City.
Ang mga nadakpan amo sanday Nestor Magno Jr., 38 anyos nga amo ang subject kag ang utod sini nga si Alcen Magno, 42 anyos kag lunsay residente sang nasambit nga lugar.
Sa interview sang Bombo Radyo kay PMajor Jose Val Ladublan, hepe sang La Paz Police Station, iya ginpahayag nga nabaklan ang subject person sang isa ka sachet sang suspected shabu nga nagabalor ₱23,500.
Kalakip sa narekober sa mag-utod ang isa ka heat sealed transparent plastic sachet sang suspected shabu, duha ka transparent plastic nga nagaunod man sang suspected shabu kag isa ka unit sang android phone nga ginapatihan ginagamit sa ila transakyon.
Nahibaluan nga may daan na nga kaso si Nestor sang 2015 may kaangtanan man sa iligal nga droga apang nakagwa ini sang 2019.
Magapangatubang ang mga ini sang kaso nga paglapas sa Republic Act 9165 ukon Comprehensive Dangerous Drugs Act of 2002.
