Ginduso ni Senator Cynthia Villar nga dapat nga may tagipusuon para sa mga mangunguma kag manugpangisda ang sin-o man nga magapungko bilang tiglikom sang Department of Agriculture (DA).
Sa subong, si President Ferdinand ‘Bongbong’ Marcos Jr. sa gihapon ang nagapungko nga agriculture secretary kag una na nagpahayag nga wala pa siya sang plano nga maghalin sa posisyon bangud kinahanglanon pa siya gihapon bangud sa dalagku nga problema sa amo nga sektor.
Suno naman kay Villar, kadamo sang maayo nga kandidato para sa amo nga posisyon, apang indi tanan “empathetic” sa stakeholders sang local agriculture industry.
“Ang gusto ko lang po, if ever mag-a-appoint sila, ‘yung may heart talaga sa mga farmers kasi maraming magagaling pero hindi talaga mahal ang agriculture at hindi mahal ang mga farmer at tsaka magsasaka,” suno sa senadora.
Nagapangibabaw sa problema sa agrikultura ang presyo sang kalamay nga masobra P100 per kilogram sa iban nga mga merkado sa Metro Manila. Ginalauman nga maganubo ini sa P85 per kilo samtang ginalauman nga mag-abot ang imports sa idalom sang Sugar Order No.2.
Sa bahin naman ni Senator Risa Hontiveros, nagpanawagan ini kay Marcos nga mag-appoint sang full-time Agriculture Secretary bangud kinahanglan ang point person nga maga-oversee sa agency kag magapasiguro sa food security. ##
