ILOILO CITY- Apat na ang narecord nga patay sa Antique bangud sa paglaslas sang bagyo Paeng.
Sa record sang Provincial Disaster Risk Reduction and Management Office sang Antique, isa ang casualty sa Sibalom, duha sa Patnongon kag isa sa Tobias Fornier.
Narecord ang una nga confirmed casualty sa Barangay Nagdayao, Sibalom kun sa diin ang biktima amo si Ernesto Lunasco, 67-anyos nga lolo kag residente sang amo nga lugar.
Suno kay Mrs. Anita Gella, bayaw sang biktima, gintuyo sang tigulang nga kuhaon ang iya baka sa tabuk sang suba apang bangud sa kadalum kag daludo sang tubig, ginapahayag nga gin-anod ini apisar nga nagtuyo nga maglangoy.
Nagpatigayon man sang rescue operation sa Tipuluan River apang gin-untat ini bangud sang mabaskog nga daludo sang tubig.
Kaina sang kaagahon sang nakit-an ang lawas sang biktima.
Samtang, sa Patnongon, ginpahayag ni ginkumpirmar naman sang Municipal Disaster Risk Reduction and Management Office responder Louie Palmes nga ang isa ka napatay ang naanod sang tubig baha matapos nga gintuyo sini nga salbaron ang iya hinuptanan nga sapat samtang ang isa ka napatay ang nakit-an sa idalom sang taytay kag ginapatihan man nga nalumos.
Sa Tobias Fornier, ginbawian sang kabuhi ang biktima nga ginkilala nga si Owa Sombilon sang natampukan sang duta sa Sitio Bakili,Brgy. Camandagan, Tobias Fornier, Antique.
Sa subong, may ara pa sang mga recorded nga missing sa nagkalain-lain nga bahin sang Antique.
