ILOILO CITY – Nag-isyu sang direktiba si President Ferdinand Marcos, Jr. sa mga concerned government agencies kasunod sang paglaslas sang bagyong Paeng sa pungsod.
Lakip sa mga mandu niya amo ang gilayon nga paghatag sang bottled drinking water sa Bangsamoro Autonomous Region in Muslim Mindanao kag pagasundan sang water purifying systems.
Dapat nga ibalik sa gilayon ang suplay sang kuryente sa tanan nga apektado nga lugar kag i-prayoridad ang mga ospital kag evacuation centers kag buligan ang mga local electric cooperatives sa pagkay-o sang damage sa distribution lines.
Ginmanduan man niya ang Department of Information and Communications Technology nga mag-activate sang pre-positioned Vsats kag satellite phones sa mga lugar nga wala sang maayo nga signal sang cellphone.
Ang Department of the Interior and Local Government ang maga-assist sa Bangsamoro Autonomous Region in Muslim Mindanao sa pag-download sang calamity funds.
Ang Department of Public Works and Highways naman ang maga-clear sang mga indi maagyan nga dalan kag magbutang sang Bailey-type temporary bridges agud nga maagyan sa pagdul-ong sang relief, medical, kag rescue mission.
Dapat nga magpasa ang National Disaster Risk Reduction and Management Council sang draft resolution nga naga-recommend sa pag-declare sang National State of Calamity agud nga ma-review niya.
Ang Department of Social Welfare and Development ang ginamanduan nga magpadayon sa pag-deploy kag pagpanghatag sang dugang nga family food packs kag tubig sa mga apektado nga residente sa evacuation kag non-evacuation sites kag maghatag sang Assistance to Individuals in Crisis Situation sa tion nga magnormal na ang sitwasyon.
Ang tanan nga mga national government agencies ang maga-coordinate sa mga local government units sa tanan nga aspeto para sa government response.
Nagmandu man ang presidente nga i-reexamine ang timely dissemination sang insakto nga impormasyon sa publiko sa forecast track sang bagyo kag ang estimated amount sang ulan agud nga mapatuman sang maayo ang preemptive evacuation kag mahagan-hagan ang numero sang nagkalamatay.
Nahibaluan nga sa pinakaulihi nga data, nagdangat na sa 45 ang nagkalamatay, kag 14 ang missing.
Una na nga gin-report nga nagdangat sa 72 ang napatay apang gin-revise ini kag ginpanubu-an.
